بأقلامهم >بأقلامهم
"فول باللحمة"!
الأربعاء 19 10 2022 08:37
القاضي م جمال الحلو
جنوبيات
هذه القصّة الطريفة أو كما يُقال بالعامّيّة "هيدي النّهفة" أخبرني بها صديق الطفولة "ناجي" فضحكتُ منها دموعًا، وطربتُ لها ألمًا.
يقول صديقي ناجي:
"فتنا أنا وصديقي خليل على مطعم شعبي بحيّ اسمو "حيّ البساطة"، حاطط إعلان عن وجبة "فووووول باللحمة" (هيك مكتوب باليافطة).
وفعلًا طلبنا لشخصين "فول مش معقول"، فأكلنا وشبعنا، حتّى إنّو مسحنا صحنين الفول.
بسّ الغريب إنّو لا دقنا ولا حتّى شفنا قطعة لحمة بالصحنين.
ناديت لصاحب المطعم (طلع رجّال كبير بالعمر) وسألتو:
وين اللحمة اللي بالفول يا حجّ؟!
جاوبني (مع عبسة): الله يحفظكم، دخلكن جبنة أبو الولد، شفتوا فيها ولد؟
قلنا: لا.
قال: جبنة البقرة الضاحكة شفتوا فيها بقرة؟
قلنا: لا.
قال: دولة القانون، شفتوا فيها قانون؟
قلنا : لا.
قال: وزارة الاقتصاد شفتو فيها تنمية اقتصاديّة؟
قلنا: لا.
قال: وزارة الطّاقة والكهرباء عم تعطيكن كهربا؟
قلنا :لا.
قال: شركة المياه عم تأمّنلكن الميّ؟
قلنا: لا.
قال: اللي رافعين شعارات الإصلاحات والتبديل شفتو منهن أي إصلاح أو تعديل؟
قلنا: لا، بسّ ما خلّوهن!
عندها فنجر عيونو وقال: فإذن، تزمرقوا وإنتو ساكتين، وما تتشاطروا عليّي!
وبالفعل أفحمنا "ذاك الختيار" ودفعنا الحساب بكلّ طيبة واختيار وضهرنا من مطعم الفول متل الشطّار".
وعطفًا علّلي صار، ضلّكن عم تاكلوا وإنتو ساكتين، وإذا خلص الفول أنا مش مسؤول...
