هناك عدّة أنواع من الأيادي باللهجة اللبنانيّة، وهي على سبيل المثال لا الحصر:

- إيدو بيضا: يعني صاحب فضل، وبيعمل خير ومعروف مع النّاس.
- إيدو ماسكة: بخيل.
- إيدو خضرا: يزرع ويُثمِر زرعه.
- إيدو طايلة: بيقدر يعمل شغلات كتيرة.
- إيدو واصلة: واسطتو قويّة.
- إيدو طويلة: يؤذي مَن حوله.
- إيدو خفيفة: حرامي، لصّ، شاطر.
- إيدو فاروطيّة: مبذّر، مسرف.
- إيدو ع قلبو: بيخاف كثير.
- إيدو والكفّ: عصبي، ما فيك تتفاهم معو.
- إيدي بحلقو: صارف عليه دم قلبي،   وعازمو شي ألف مرّة.
- إيدي بزنّارك: بطلب مساعدتك.
- إيد من ورا وإيد من قدّام: مفلّس وما معو نِكلة، وعايف التّكنة.
- جايي يلولح بإيدو: راجع ما جايب  معو شي.
- نفضت إيدي منّك: ما بقى إلك خصّة معي. 
- إيدك وما تعطيك: تهديد، إِللي بيطلع بإيدك ساويه.
- على حطّة إيدك: متل ما أنا ما تغيّرت، مكانك راوح. 
- اللي إيدو بالميّ مش متل اللي إيدو بالنّار: ما هاكل همّ حدا. 
- ماسكو من إيدو إلّي بتوجعو: ماسك عليه ممسك.
- إيدي عراسك: احلف بدون كذب.
- شو طالع بإيدي: مغلوب ع أمري.
- إيدي بزلاعيمك: متفضّل عليك.
 
وأخيرًا وليس آخرًا يبقى انّ هناك أيادي خفيّة في الحياة اللبنانيّة تعمل بشكلٍ سرّي من وراء الكواليس وبأوامر من السّاسة الظّالمة لقصم ظهر المواطن اللبناني المسكين. 
  فضلا عن ان وضع دولتنا العليّة على كلّ الصّعد والمستويات بيطّبّق عليها مقولة: "حارة كلّ مين إيدو إلو".
إن شاء الله ما كون نسيت ولا إيد...