من أجمل الأمثال تلك التي كنت أسمعها من جدّتي "رحمها الله"، ومنها:
- يلّي مالو بنات... ما حدا بيعرف إمتى مات.
- يلي حظّها قوي بتجيب البنت قبل الصبي. 
- البنت هديّة... والصبي بليّة.
- الحياة بدون أخت متل الطريق بلا زفت. 
- عشر أصهرة ع باب داري ولا كنّة تكشف أسراري. 
- يلّي بدّها يسعدها زمانها... تجيب بناتها قبل صبيانها.
- دلّلي كنّتك واكسبي ودّها لأنّو إذا نوت عالشرّ ما حدا بردّها.
- ابن الأصل لو طعميتو خبز حاف بيصون... وقليل الأصل لو طعميتو لحم الكتاف بيخون.
- فكّرناهن رخصوا... طلعوا ببلاش.
- بنت الأصل بتخلّي كوخها قصر. 
وبتنهيدة من الأعماق ومعها الدمع رقراق، كانت تقول (طيّب الله ثراها):
- دنيا ما عليها عتب، فيها المصدّي وفيها الدهب.
وتبقى الأمثال الشعبيّة تحاكي الواقع لا الخيال، ويبقى في ذاكرة كلّ منا مثلٌ يعيش في أعماق وجدانه يذكّره بماض ولّى، وحاضر تجلّى، ومستقبل لا حول ولا...
 ويبقى الأمل بالله الخلاص الوحيد لآلامنا كلّها.