- وطّي صوتك لمّا بتحكي. الصوت العالي منّو معيار الصدق. 

- ما تحطّ إجر ع إجر قدّام حدا كبير.

- ما تضلّ قاعد وتارك حدا كبير واقف.  

- وقّف بعيد عن الباب بس تدقّ على حدا.

- ما تتّصل بحدا بوقت متأخّر إلّا للضرورة القصوى. 

- بتقعد عالكرسي اللي ما بيكشف البيت تتحافظ ع حرمتو. 

- ما بيصير تزعّل حدا قاعد ببيتك.

- دقّ عالباب قبل ما تفتحو.

- ما تحكي والأكل بتمّك وسكّر تمّك وإنت عم تاكل.

- انطور الكلّ يقوموا عن الأكل إذا إنت اللي عازم.

- بتفوت بيت العالم بتضلّك أعمى وبتطلع أخرس.

-ببيت غريب ما تقوم من مطرحك غير لمّا حدا يقلّك.

- قوم معنا رايحين نعيّد على قرايبنا.  

- شيل مع عمّك الأكياس وساعد الكبار. 

- قوم خلّي الخالة تقعد.

- ما تطلع ورا بنت على الدرج، يا بتطلع قدّامها يا بتنطر شويّ وبتطلع. 

- لو حدا طالع وراكي وقّفي بزاوية الدرج خلّيه يمرق وبعدين اطلعي.

- إنت مش أحسن من حدا، ولا حدا أحسن منك.

- ما تقارن حالك مع حدا بتتعب. 

-قول شكرًا، قول عفوًا، اللي بيعتذر بالأوّل هو الأقوى.

- ما تاخد شغلة مش إلك من إيد حدا.

-ما تسبق حدا كبير وإنت عم تمشي.  

-افتاح الباب للكبير. 

- إذا شفت باب مسكّر بتدقّ عليه حتّى لو بتعرف إنّو ما في حدا.

- قول الحقّ والصدق ولو على قطع رقبتك.

- لبس البيت غير لبس النوم.

- هيدا حرام وبيغضب ربّنا.

- لا تعيب على حدا، ولا تقلّل من قيمتو.

- إذا شفت حدا مسكين ومحتاج وقّف جنبو باللي بتقدر عليه، إيّاك تتخلّى عنو. 

- اجبور خاطر غيرك وحبّ الخير لغيرك.

- ما تعمل إزعاج والعالم نايمين.

- خلّيك بحالك ما تتدخّل بخصوصيّات العالم، إلّا بالخير.

- ما تكبّ شي بالشارع.

- نضّف مطرح ما وسّخت.

العالم المحترمين من زمان، كانوا يربّوا ولادهم هيك، وهيك ربّونا أهلنا. فلو بدكم خير وبركة أيّام زمان ترجع، لازم تربّوا ولادكم هيك.

(ربّي ارحمْهما كمّا ربّياني صغيرًا).