من حكايا الزّمان حيث الألفة والمحبّة والعطاء والأمان، تتبلور حكايتنا باللهجة العاميّة المستحبّة لدى النّاس الطيّبين:

لمّا تفوت على بيت وتشوف:

- المنشفة معلّقة عالباب.

- إبرة البابور مخبّاية على حفّة الباطون تبع الشبّاك من جوّا.

- الصينيّة واقفة ورا الحنفيّات.

- وصلة نبريج طولها شبر معلّقة بالحنفيّة.

- سلّم خشب تبع التتخيتة واقف ورا الباب.

- الطناجر مصفوفين على رفوف الرّخام الأبيض فوق المجلى.

- (صطل الحديد) تبع الشطف وجاطات البلاستيك تحت المجلى بخزانة ما إلها باب، إلها برداية قماش.

- بركة ميّ من حجر على التتخيتة وتكتكة الميّ طول الليل.

- مكنسة ومقشّة ملبّسين إيديهن بيت قماش حتّى يضاينوا ومعلّقينهن ورا باب المطبخ على مسمار مدقوق بالحيط.

- تنك جبنة وتاترا وبرميل الفيجيتالين معبّايين رمل ومزروع فيهن الفلّ والياسمين والحبق وشويّة نعنع وشويّة حرّ أخضر وأحمر.

- برميل حديد كبير على السّطيحة مليان ميّ لوقت العازة للشطف.

- جنزوقة من حبال مربوطة عالبراندا.

- طراريح مفروشين بالأرض للتسطيح جنب التلفيزيون.

- بساط وحصيرة.

- سجّاد ملفوف ومربوط بكلسات النيلون النسواني وريحة النفتالين معبّقة بكلّ البيت.

- طبليّة خشب كبيرة مدوّرة وعليها صدر نحاس مدوّر للأكل.

- كيس قماش أبيض معلّق ورا الباب بقلبو ملوخيّة.

- مسلّة الإبر تبع الخياطة مصنوعة من سفنج قماش وإلها إيد معلّقة ورا الباب ومشكوكين فيها الإبر.

- علبة تنك بيتيفور وبسكوت محطوط فيها زرار وسحّابات وكركر الخيطان والكبشة والكشتبان.

- الشمعة واقفة على صحن القهوة.

- التّوم معلّق على البراندا بالمشكاة.

- البطّيخ تحت التّخت.

- بزر البطّيخ والشمّام بالصنيّة عم يتشمّسوا قبل ما نحمّصهن.

- مطحنة البنّ والمَحْمَصْ مع قاعدتو بالنمليّة.

- الشمّام معصور ومفرّز بقوالب التّلج الألمنيوم.

- نبريج الأرغيلة معلّق على مسكة الباب.

- كانون الفحم بالتتخيتة مع برميل الفحم مع كلّ أنواع الكبيس والزيتون.

- شرشف مطرّز مفروش فوق التلفيزيون اللي خزانته موبيليا.

- ترانس كهرباء صغير محطوت على خشبة ورا التلفيزيون لتشغيلو.

- هاوس مثبّت جنب التلفيزيون حتّى تحوّل من قنال ٧ لقنال ١١.

- صوفات حديد عليهم فرشة صوف ومساند قشّ.

- تشقيعة عليها فرش ولِحِف الصّوف مصفوفين فوق بعض.

- كبريت المدفع على حفّة الغاز.

- قنّينة الغاز تحت المجلى ولابسة فستان قماش.

- حساسين مزروبين بقفص (خشبي) عم بزقزقوا.

-مطرقة دبّان ومروحة قشّ على الصّوفا.

ساعتها: لازم تعرف إنّك فتت على بيت لبناني قديم.

"إنه الزّمن الجّميل، زمن الأصالة والشّهامة.

فما أجملها من أيّام،ليس فيها غدر اللئام".