يُذكر في الأمثال:
"عند الامتحان يُكرم المرء أو يُهان".
إنّها أسئلة امتحان لكلّ ممثّل عن مدينة بيروت للنّظر بأمر القبول به (كممثّل عنها) أو عدمه.
بتعرف وين حيّ الطمليس، وزاروب إمّ زكّور، وحيّ التّنك، وحيّ العرب، وحيّ الباشا، وحمّام النّزهة، ومستشفى محمّد خالد، ومستشفى عدنان حيدر، ومستشفى الغريّب؟
بتعرف وين زاروب عبلة، وزاروب العليّة والخليّة السّعوديّة؟
بتعرف حيّ النّاصرة، وحيّ البرجاوي، أو سامع بمسجد بيضون بالأشرفيّة، والخضر بالكرنتينا؟
سامع بمقبرة اليهود، ودرج اليهود، ومقبرة السّنطية؟
بتعرف وين قبر الوالي ببيروت؟
بتعرف وين بيت شارل ديغول بالمصيطبة؟
بتعرف دارة آل سلام وين بالتّحديد؟
بتعرف شو بيعني عرزال الأوزاعي وزيارة المقام لأهل بيروت؟
بتعرف قهوة أبو رياض، والصّلح، وحمد، والقزاز، والمجدلاني، وصليبا، ودوغان؟
وسابح عالدّالية؟
سامع بقبضايات البسطة؟
بتعرف درج الفنّ، ودرج عين المريسة؟
عامل أربعة أيّوب على شطّ رملة البيضا؟
آكل مفتّقة عند المكاري بالبسطة؟
بتعرف بيت الرئيس شفيق الوزّان عالبسطة؟
وبتعرف كم رئيس طلع من البسطة، وكم نائب، وكم واحد ترشّح وسقّطوه وشو السّبب؟
بتعرف شو لقب منطقة البسطة يلّي كانت معقل القبضايات وأصحاب الشرف والمروّة؟
بتعرف كم فنّان غنّى لبيروت وتحديدًا للبسطة؟
بتعرف كم مستشفى كان عالبسطة، يلّي صارت يتيمة وأهلها منسيّين ومهمّشين؟
بتعرف نمر الوادي تاع الكنافة وين محلّو؟
بتعرف منطقة الخولا، وقهوة الملاّ،وجامع القصّار؟
بتعرف عبد الله تاع الكاز، ووين كان طنبر الدعبول؟
بتعرف كاراج درويش، وحي السّبيل، وزاروب الزعزع وين؟
سامع بالكابتن عدنان الشرقي هوّي وعم يبهدل اللعّيبة؟
بتعرف نادي مليح عليوان وين؟
آكل فلافل عند أبو نبيل ع الزيدانيّة؟
سامع بمحل مشاوي أمّونة والصّفدي وأبو خضر وأبو النّوّاس؟
بتعرف النّادي الرّياضي وتاريخو؟
آكل كروش وأبوات عند منصور وعلما؟
وآكل الأرنبيّة والمغربيّة ع الطريقة البيروتيّة؟
دايق السّحلب من "الأوتوماتيك" بوجّ البلديّة؟
شارب جلّاب من عند بركة العنتبلي؟
آكل أمّ قليباني مشويّة؟
ملعوص الحمّيضة بالرّبيع؟
بتعرف إنّو الرئيس بشارة الخوري كان يفيق من النّوم ع صوت مفتي الجمهوريّة البيروتي ويلاقيه فوق راسو عم يطالب بحقوق بيروت؟
بتعرف شو يعني مطعم مسّيس، ومرّوش، والرّوضة، ودبيبو، ونصر، وعروس البحر؟
بتعرف الشّاعر الكبير عمر الزعنّي؟
بتعرف تقول عشر أمتال بيروتيّة؟
بتعرف وين نادي التّعاضد، ونادي النّجمة، ونادي الأنصار؟
بتعرف وين صاروا أهالي بيروت؟!
إذا بتعرف تجاوب على هالأسئلة وتحلّ قهرتنا، أو على الأقلّ ع خمسين بالميّة منهن، وتلاقيلنا موطأ قدم ببيروت، منفديك بأرواحنا وأولادنا، هول يلّي بعدنا منمون عليهن.
صدّقني ولمّا تزورنا بتشوف بعيونك بسّ عزّة نفسنا وكرامتنا عم تعملّك هالامتحان يا حضرة النّائب عن بيروت المحروسة (ويا لها من نائبة لو جهلت ما نقول ) !
بسّ ما بعرف ليش إحساسي بقلّي ما عندك أجوبة ورح يكونوا علاماتك صفر بهالامتحان، كرمال هيك نحنا كمان ما عنّا ثقة نعطيك ياها، إلك معنا وما معنا، الله وحده معنا.
روح عمّي روح، البيروتي العتيق موجوع ومكلوم، وحامل كلّ الهموم، بالقهر صاير غريق، وبالظّلم عامل حريق...
