أخبرني أحد الأصدقاء ممّن يتميّزون بخفّة الظّلّ، ودماثة الأخلاق، ونقاء السّريرة، أنّ هناك دراسة حديثة حول سعادة المواطن اللبنانيّ.

يقول هذا الصّديق الصّدوق "وعلى وجهه ابتسامة لطيفة تعكسها دمعة مبطّنة في غور عينيه":

إنّ هذه الدّراسة توصّلت (بعد تقصٍّ عميق، وجهد جهيد، وتعب ومشقّة) إلى أنّ اللبنانيّ من أكثر شعوب الأرض سعادة! 

وبالعربي الدّارج:

إذا إجت الكهربا ساعة بينبسط. 

إذا فوّل سيّارتو بنزين (مخلوط بالميّ) بينبسط. 

إذا لاقى مصاري ب ATM بينبسط. 

إذا وصل ع بيتو وطلع بالأسانسير بينبسط. 

إذا لقى تخت بالمستشفى (ولو عم بموت) بينبسط. 

إذا جاب غالون زيت (بعجقة المول) بينبسط. 

إذا شاف علامة (الواي فاي) ع موبايلو بينبسط. 

إذا زمط من شي انفجار بينبسط. 

إذا زادولوا معاشو 10$ بينبسط. 

إذا علّولوا سقف السّحوبات من البنك (وحسمولوا 90 بالميّة منهن) بينبسط.

إذا إجت المي "ولو فيها ريحة مجارير" بينبسط.

اذا سرقولوا مصرياتو "وخلّوه طيّب" بينبسط.

إذا علّوا الأسعار ١٠٠ ضعف وبعدين نزلوا الاسعار "ليرتين" بس بينبسط.      

إذا لاقى فيزا وهاجر من بلدو بينبسط. 

لِك، الله يهدّ جبركن يا "حكّام القهر والخذلان، والنّفاق والحرمان".

 خلّيتوا النّاس تعيش هاجس الوسواس القهري. 

ولا أقول لكم إلّا ما ذكره الله في محكم تنزيله:

 "وسيعلم الذين ظلموا أي منقلب ينقلبون".

صدق الله العظيم.