تحدثت الفنانة حنان ترك عن عودتها إلى المجال الفني من جديد، بعد ولادة ابنتها الخامسة، لكن من خلال الأداء الصوتي داخل الأفلام الكرتونية، ونفت أي نية لديها للعمل في مسلسلات درامية أو سينمائية، موضحة ميلها إلى المسلسلات الكرتونية.
وقالت «ترك» في برنامج «بالعربي ET»: «أنا موجودة لكن في مجال موازٍ للمجال بتاعي وهو الكارتون، لأن عالم الكارتون سحرني وخلاص أخد كل وقتي، وبحضّر لشخصية جديدة اسمها نونا ومن المفترض أن بيتعملها المسلسل دلوقتي وقاعدة شغالة عليه بس طبعا كلكم عارفين شغل الكارتون بيحتاج وقت رهيب جدا».
وتابعت: «مفيش شغل تلفزيون أو مسلسلات ومفيش حاجة جذبتني أقدر أعملها ده بكل صراحة، وشيء صعب كمان أن العمل لازم يناسب وضعي الحالي، لكن أنا عملته قبل كده لكن ده كان أحسن ما قدرت أعمله إنما هل هو الصح أو المظبوط مش عارفة، لكن دلوقتي مش شايفة أن حاجة تقدر تغريني إلى هذه الدرجة لكن مجربتش كمان أكتب سيناريوهات بس ممكن أجرّب».
واستكملت: «أنا باركت في رمضان للأستاذ عادل إمام ولفت نظري محمد رمضان بس مش عايزة أظلم الباقي لأني ماكنش عندي وقت خالص أتفرج إلا على الاثنين دول لأنهم بيتعرضوا مع وقت الفطار والسحور، وللأسف مشفتش مسلسل منى زكي (أفراح القبة) وسمعت عنه بس أعتقد كل الناس علقت عليه بأن هو لازم يتشاف بدون مسابقة رمضان لأنه مسلسل تقيل وحلو أوي».